Policia ka zbardhur dinamikën e ngjarjes në Korçë, ku bën me dije se 81-vjeçari që u dërgua në spital me shenja të shumta dhune, ishte goditur nga një 72-vjeçar dhe se të dy kishin qenë në gjendje të dehur.
Blutë e Korçës raportojnë se tashmë 72-vjeçari Gëzim Agollari është vënë në prangat e policisë, ndërsa i dëmtuari Gaqo Pili ndodhet në spital, nën kujdesin e mjekëve.
I moshuari raportohet se ka deklaruar në polici se kanë pirë në banesën e 81-vjeçarit dhe më pas janë konfliktuar pa arsye.
“Korçë/Zbardhet ngjarja e ndodhur mëngjesin e sotëm në lagjen nr.15, ku në banesën e tij, u gjet i dëmtuar me sende të forta, një 81-vjeçar.
Policia identifikon, kap dhe arreston në flagrancë autorin e dyshuar të ngjarjes.
Në vijim të informacionit paraprak të dhënë ditën e sotme, në lidhje me ngjarjen ku në lagjen nr. 15, Korçë, në banesën e tij u gjet i dëmtuar me sende të forta shtetasi G. T., 81 vjeç, ju informojmë se:
Shërbimet e Komisariatit të Policisë Korçë, në bashkëpunim me Specialistët e Seksionit për Hetimin e Krimeve ndaj personit të DVP Korçë, në drejtimin e Prokurorisë, në vijim të punës për zbardhjen dhe dokumentimin me prova ligjore të kësaj ngjarjeje, bënë të mundur identifikimin dhe kapjen e autorit të dyshuar. Si rezultat u arrestua në flagrancë shtetasi:
-G. A., 72 vjeç, banues në Korçë.
Nga veprimet e kryera rezulton se ky shtetas ka qenë së bashku me shtetasin G. T., në banesën e këtij të fundit, ku dyshohet se në gjendje të dehur e ka goditur 81-vjeçarin me sende të forta. Shtetasi G. T., vijon të ndodhet në spitalin e Korçës në kujdesin e mjekëve.
Materialet proçedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Korçë, për veprime të mëtejshme për veprën penale “Plagosja e rëndë me dashje””, njofton policia.
